اسلام آباد (این این آئی)وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ عمران خان گرفتاری سے بچنے کیلئے سرے عام ریاست اور عدالت کی رٹ کو چیلنج کر رہا ہے۔ اپنے بیان میں وفاقی وزیر نے کہاکہ انہوں نے توہین عدالت ہی نہیں کی بلکہ عدالتی حکم کی بھی دھجیاں آڑائیں لیکن ان کے خلاف کوئی عدالتی ایکشن نہیں ہورہا ہے، غیر مسلح پولیس پر عمران خان کے مسلح کارکنان کا تشدد ناقابل معافی ہے،یاسمین راشد کی آڈیولیک تحریک انصاف کے کارکنان کا مسلح اور پر تشدد ہونیکا ثبوت ہے،عدالت کو اس کا سختی سے نوٹس لینا چاہیے۔ انہوںنے کہاکہ اگر پیپلز پارٹی نے اس طرح کیا ہوتا تو ہم پر ملک دشمن ہونے کے فتوے لگ چکے ہوتے۔ شیری رحمن نے کہاکہ یہاں غیر مسلح پولیس پر پیٹرول بم گرائے گئے پھر بھی کوئی کارروائی نہیں ہو رہی۔ وفاقی و زیر نے کہاکہ تاریخ میں یاد رکھا جائے گا ڈرپوک خان نے گرفتاری سے بچنے کیلئے پولیس پر پیٹرول بم گرائے۔ وفاقی وزیر نے کہاکہ کیا سیاسی جماعتیں اس طرح کی احتجاج کرتی ہیں؟ انہوں نے پوری دنیا میں ملک کا تماشہ لگا ہے۔ شیری رحمن نے کہاکہ یہ نا عدالت میں پیش ہوتے ہیں نا ہی عدالت کا حکم مانتے ہیں، عدالت اپنی اور ریاست کی رٹ کا تحفظ کرے۔
