لاہور( این این آئی ) سابق وزیر داخلہ شیخ رشید احمد نے کہا ہے کہ اب الیکشن ہوں گے یا توہین عدالت کافیصلہ آئے گا ،پوری قوم کی نظریں سپریم کورٹ پرلگی ہوئی ہیں،بالآخر عدلیہ کوآئینی فیصلوں کا احترام کروانا ہے اور ان کو یہ کام بخوبی آتاہے ،قومی اسمبلی تحلیل ہوگی توپھر ہی ایک دن میں الیکشن ہوں گے ،حکومت تاریخ دے کس دن اسمبلی تحلیل کرنی اورجنرل الیکشن کرانے ہیں۔ اپنے بیان میں شیخ رشید نے کہا کہ ایک سال گزرگیا آئی ایم ایف سے معاہدہ مکمل نہیںہوسکا،سماجی سیاسی اقتصادی اورعدالتی بحران اپنے فائنل رائونڈپرہے ،عوام غربت اور مہنگائی کی چکی میں پس رہے ہیں حکومت اقتدار بچانے کے چکرمیں عوام اوردنیا دونوں سے تنہااور دور ہوگئی ہے۔ انہوں نے کہا کہ حکومتی اتحادیوں کی حالیہ میٹنگ ٹوٹ پھوٹ کاشکار تھی، پی ڈی ایم میں واضح پھوٹ پڑچکی ہے ،عدالت کی حکم عدولی ہوچکی ہے ،ایک دو روزمیں سزاکی سمت کاتعین ہوجائے گا۔الیکشن نہیں کرانے تونگران حکومت نے گھرجاناہے ترقیاں تبادلے نہیں کرنے،پیپلز پارٹی ، ایم کیو ایم ،باپ اپنے فیصلے پرپچھتارہی ہیں،اکثریتی پارٹیاں عوام کے دلوں سے اتر گئیں۔
