لاہور( این این آئی)سیشن کورٹ میں مخالفین نے پیشی پرآنے والوں پر فائرنگ کر دی جس کی زد میں آکر خاتون سمیت دو افراد جاں بحق ہو گئے ، فائرنگ سے بھگدڑ مچ گئی ،پولیس نے شواہد اکٹھے کرنے کے بعد لاشیں مردہ خانے منتقل کر دیں۔ بتایاگیا ہے کہ سیشن کورٹ میں پیشی پر آئے مخالفین پر اندھا دھند فائرنگ کر دی جس کی زد میں آکر خاتون سمیت دو افراد موقع پر ہی دم توڑ گئے ۔ ایدھی ترجمان کے مطابق جاں بحق ہونے والوں کی شناخت صغری بی بی اور محمد امین کے نام سے ہوئی ہے۔ فائرنگ سے سیشن کورٹ میں بھگدڑ مچ گئی اور لوگ اپنی جانیں بچانے کے لئے بھاگ کھڑے ہوئے ۔ اطلاع ملتے ہی پولیس کی بھاری نفری بھی موقع پر پہنچ گئی جس نے فرانزک ماہرین کو طلب کر کے شواہد اکٹھے کر کے لاشیں مردہ خانے منتقل کر دیں۔پولیس کے مطابق واقعہ کی تحقیقات کا آغاز کر دیا گیا ہے ۔
