اسلام آباد (این این آئی)پاکستان اور امریکہ کے درمیان کثیر جہتی امور پر تعاون کے فروغ پر اتفاق کیا گیا ۔امریکہ میں پاکستانی سفیر نے امریکی اسٹنٹ سیکرٹری آف سٹیٹ برائے بین الاقوامی آرگنائزیشن امور ایمبیسیڈر مشیل جے سیزان سے ملاقات کی جس میں پاک امریکہ کثیرجہتی امور میں تعاون خصوصاً پائیدار ترقی کے اہداف کے حصول میں تعاون، بہتر روابط اور ڈیجیٹل شمولیت سمیت مختلف امور پر تبادلہ خیال کیا گیا۔سفیر پاکستان مسعود خان نے اپنے ٹوئٹ میں کہا کہ امریکی اسٹنٹ سیکرٹری آف سٹیٹ برائے بین الاقوامی آرگنائزیشن امور مشیل جے سیزان سے ملاقات باعث مسرت رہی۔ سفیر پاکستان نے ملاقات کو نتیجہ خیز قرار دیتے ہوئے کہا کہ دوران ملاقات کثیر الجہتی امور پر دونوں ملکوں کے درمیان تعاون ، روابط میں بہتری لانے اور ڈیجیٹل شمولیت کے فروغ پر تبادلہ خیال کیا گیاسفیر پاکستان نے بات چیت کو مثبت گفتگو قرار دیا۔ مشیل سیزان نے ٹوئٹ کرتے ہوئے کہا کہ سفیر پاکستان مسعود خان کے ساتھ ملاقات مثبت رہی اور اس دوران کثیرجہتی تعاون کو وسعت دینے اوراقوام متحدہ کے پائیدار ترقی کے اہداف کے حصول اور دیگرامور پر تبادلہ خیال ہواپاکستان اور امریکہ کے درمیان دو طرفہ تعلقات کے فروغ اور مختلف شعبہ جات جن میں تجارت، سرمایہ کاری، صحت، توانائی، زراعت اور ٹیک سیکٹر جیسے اہم شعبہ جات شامل ہیں کے فروغ کیلیے روابط کو تیز کیا گیا ہے۔ دونوں ممالک کثیرجہتی پلیٹ فارمز جن میں اقوام متحدہ نیویارک، جنیوا میں اقوام متحدہ کی تنظیموں اور ویانا، نیروبی، اٹلی اور پیرس میں اقوام متحدہ سے منسلک خصوصی تنظیمیں شامل ہیں ان پر تعاون کو مزید فروغ دیں گے۔ پاکستان اور امریکہ غذائی تحفظ، موسمیاتی چیلنج اور عالمی مالیاتی ڈھانچے سے متعلق درپیش مسائل کے حل کیلئے مل کر کام کریں گے۔ علاوہ ازیں امریکہ اور جی 77 کے ممالک کے درمیان باہمی مفادات کے امور پر بھی ڈائیلاگ ہوگا۔ اس وقت پاکستان جی 77 تنظیم کا چیئرمین ہے۔ حال ہی میں پاک امریکہ ہیلتھ ڈائیلاگ منعقد کیا گیا جس میں وبائی امراض، ماں اور بچے کی صحت، ویکسین کی تیاری اور غیر متعدی امراض سے لڑنے کیلئے دونوں ممالک کے درمیان مزید تعاون پر اتفاق کیا گیا۔
