بغداد(این این آئی)عراقی وزیر اعظم محمد شیاع السوڈانی نے اتوار کے روز ایرانی سپریم نیشنل سیکورٹی کونسل کے سیکرٹری علی شمخانی اور ان کے ہمراہ وفد کا استقبال کیا۔غیرملکی خبررساں ادارے کے مطابق ملاقات میں دونوں ملکوں کے درمیان تعلقات، خطے کی سلامتی اور سیاسی صورتحال اور اس کی سلامتی و استحکام کو بڑھانے کے طریقوں پر بات چیت کی گئی۔ ملاقات کے دوران وزیر اعظم نے عراق کے ثابت قدم موقف کی توثیق کی اور کہا کہ عراقی سرزمین کو کسی بھی پڑوسی ملک کے خلاف جارحیت کا چشمہ نہیں بننے دیا جائے گا۔انہوں نے عراق کی سرزمین کو مسلح گروہوں کی موجودگی کا تھیٹر بننے، یا انہیں نشانہ بنانے یا عراقی خودمختاری کی کسی بھی خلاف ورزی کا نقطہ آغاز ہونے کے اپنے واضح انکار پر زور دیا۔ملاقات میں اسلامی جمہوریہ ایران اور مملکت سعودی عرب کے درمیان طے پانے والے حالیہ مفاہمت کے معاہدے کی پیشرفت کا جائزہ لیا گیا۔ محمد شیاع السوڈانی نے اس سلسلے میں کہا کہ عراق اس معاہدے کا خیر مقدم کرتا ہے اور اس کے لیے ہر وہ چیز فراہم کرنے کے لیے تیار ہے جس سے خطے کے استحکام میں اضافہ ہو۔علی شمخانی نے اس راستے میں عراقی کردار کے لیے اپنے شکریہ کی تجدید کی اور عراقی وزیر اعظم کو ایرانی صدر ابراہیم رئیسی کا تہنیتی پیغام پہنچایا۔ انہوں نے دوطرفہ تعلقات کو فروغ دینے کے لیے ایرانی خواہش کا اظہار کیا اور کہا کہ بہتر تعلقات دونوں ملکوں کے مفاد میں ہیں۔وزیر اعظم کی سرپرستی میں دونوں ممالک کے درمیان مشترکہ سیکیورٹی رپورٹ پر دستخط کیے گئے جس پر عراقی قومی سلامتی کے مشیر قاسم الاعرجی اور ایران کی جانب سے علی شمخانی نے دستخط کیے۔
