ریاض(این این آئی)امریکی صدر کے ایلچی برائے موسمی تغیرات جان کیری کے دورہ سعودی عرب کے بعد جاری مشترکہ اعلامیے میں کہا گیا ہے کہ دونوں ممالک بڑھتے ہوئے موسمیاتی چیلنجز پر سنجیدگی اور تیزی سے توجہ دینے کے لیے پرعزم ہیں۔میڈیارپورٹس کے مطابق اس موقع پر جاری ہونے والے مشترکہ اعلامیہ میں کہا گیا کہ دونوں ممالک پیرس معاہدے پر عمل درآمد مضبوط کرنے کے لیے کام کریں گے، اور جی 20 کی اٹلی میں کامیابی اور گلاسگو میں منعقد ہونے والی اقوام متحدہ کی موسمیاتی تبدیلوں پر کانفرنس آف دی پارٹیز کے فروغ میں فعال کردار ادا کریں گے۔دونوں ممالک نے گرین ہائوس گیسوں کے اخراج کو کم کرنے کی اہمیت اور سنہ 2020 کی دہائی میں سخت اقدامات کرنے کا اعلان کیا تاکہ موسمیاتی تبدیلیوں کے منفی نتائج سے بچا جا سکے۔مشترکہ اعلامیہ امریکی صدر کے ایلچی برائے موسمی تغیرات جان کیری کے دورہ سعودی عرب کے بعد جاری کیا گیا جہاں انہوں نے ولی عہد شہزادہ محمد بن سلمان سے ملاقات کی جبکہ نائب وزیر خارجہ عادل الجبیر سے جان کیری کی ملاقات منگل کو ہوئی تھی
