اسلام آباد (این این آئی)ایم کیو ایم نے پیکا ترمیمی آرڈیننس پر عدم اعتماد کر دیااس سلسلے میں وفاقی وزیر آئی ٹی سید امین الحق نے متنازعہ پیکا ترمیمی آرڈیننس پر وزیراعظم کو خط لکھ دیا ۔ وفاقی وزیر نے کہاکہ ترامیم سے متفق نہیں کیونکہ اس میں اسٹیک ہولڈرز کو اعتماد میں نہیں لیا گیا، ترامیم میں بلاضمانت گرفتاری اور فیک نیوز کی تشریح نہ ہونے سے ملک میں بے چینی پھیل رہی۔ اپنے بیان میں انہوںنے کہاکہ صحافتی تنظیموں، انسانی حقوق تنظیموں و ماہرین کی رائے لی جاتی تو بہتر ترامیم ہو سکتی تھیں۔ وفاقی وزیر نے کہاکہ صحافت ریاست کا چوتھا ستون ہے، ہر حکومت میڈیا سے اپنے تعلقات کا مزہ لیتی رہی، ترمیمی آرڈیننس کی وجہ سے صحافی و صحافتی اور میڈیا تنظیمیں حکومت کے خلاف ہورہی ہیں۔ وفاقی وزیر نے کہاکہ بنا مشاورت جاری آرڈیننس کے خلاف صحافتی و میڈیا تنظیموں نے احتجاج کا اعلان کردیا ہے۔سید امین الحق نے کہاکہ اتحادی ہیں تاہم عوام کے بنیادی حقوق کیلئے جدوجہد کرنے والی تنظیم سے تعلق اہم ہے، ایم کیوایم کی اندازسیاست میں بنیادی حقوق کیخلاف قوانین کی حمایت کسی صورت نہیں کرسکتے۔ وفاقی وزیر سید امین الحق نے کہاکہ ترمیمی آرڈیننس حکومت کی عوامی حمایت کیلئے خطرہ اور آزادی اظہار رائے کیخلاف ہے۔ وفاقی وزیر نے کہاکہ وزیراعظم سے امید ہے کہ وہ صحافتی تنظیموں اور اسٹیک ہولڈرزسیمشاورت کیبعد نئی ترامیم کااجرا کرائیں گے۔
