بھارت نے کشمیر سے متعلق او آئی سی کے بیان کو پھر مسترد کر دیا

0
53

نئی دہلی(این این آئی)بھارت نے کشمیر سے متعلق او آئی سی کے بیان کو پھر مسترد کر دیا،او آئی سی نے بھارتی حکومت پر کشمیر میں ڈیموگرافک ڈھانچے کو تبدیل کرنے اور کشمیریوں کے حقوق کی خلاف ورزی پر آواز اٹھائی تھی،میڈیارپورٹس کے مطابق کشمیر کی تازہ صورت حال سے متعلق 57 رکنی اسلامی تعاون تنظیم (او آئی سی)کے تازہ بیانات کو بھارت نے غیر ضروری قرار دیتے ہوئے مسترد کر دیا اور اپنے دیرینہ موقف کا اعادہ کیا کہ خطہ جموں و کشمیر اس کا اپنا اٹوٹ حصہ ہے اور اس سے متعلق کسی دوسرے فریق کو مداخلت کی اجازت نہیں۔نئی دہلی میں وزارت خارجہ کے ترجمان نے اریندم باغچی نے او آئی سی کے بیانات پر اپنے رد عمل کا اظہار کرتے ہوئے کہاکہ ہمیں افسوس ہے کہ او آئی سی سکریٹریٹ نے ایک بار پھر بھارت کے اندرونی معاملات پر غیر ضروری تبصرہ کیا ۔ان کا مزید کہنا تھاکہ حکومت ہند، ماضی کی طرح اس بار بھی مقبوضہ کشمیر جو بھارت کا اٹوٹ اور ناقابل تنسیخ حصہ ہے،سے متعلق او آئی سی کی طرف سے کیے گئے دعووں کو مسترد کرتی ہے۔