لاہور( این این آئی)سینئر اداکارہ نشو بیگم نے کہا ہے کہ میں نے فلم انڈسٹری کے عروج میں ہی شوبز کو خیر باد کہہ دیا تھا، آج بھی جب کبھی شوبز انڈسٹری کی رونقیں یاد آتی ہیں تو عجیب سی خوشی محسوس ہوتی ہے ۔ ایک انٹر ویو میں انہوں نے کہا کہ ہمارے دور میں اسٹوڈیوز میں بیک وقت چار ، چار فلموں کی شوٹنگ ہوا کرتی تھی اور تمام اداکار فلموں کے سیٹ پر موجود ہوتے تھے،اس وقت گھر کی طرح ماحول ہوتا تھا سب ایک دوسرے کا خیال رکھتے تھے ،ایک دوسرے کو بڑی عزت دی جاتی تھی۔انہوں نے کہا کہ اس وقت بڑے باکمال ر ائٹرز اور منجھے ہوئے ہدایتکار تھے اور انہی کی وجہ سے فلم انڈسٹری عروج پر گئی ۔انہوں نے کہا کہ میں نے اپنے وقت کے تمام ہیروز کے ساتھ کام کیا ہے ، میں نے فلم انڈسٹری کو عروج کے دور میں خیر باد کہا حالانکہ اس وقت لوگ انڈسٹری سے جڑے رہنے کیلئے بے پنا ہ کاوشیں کرتے ہیں۔
