ریاض(این این آئی) سعودی عرب نے مملکت کے ویژن 2030 کے اہداف کے حاصل کرنے کے لیے ویزا درخواست کے طریقہ کار کو آسان بنانے کے لیے سعودی ویزا کے نام سے ایک متحد ویزا پلیٹ فارم کا آغاز کیا ہے۔غیرملکی خبررساں ادارے کے مطابق ایگزیکٹو امور کے معاون وزیر خارجہ عبدالہادی المنصوری نے ڈیجیٹل گورنمنٹ فورم کے دوران کہا کہ یہ پلیٹ فارم 30 سے زائد ایجنسیوں، وزارتوں اور نجی شعبے سے منسلک ہے۔ تاکہ حج و عمرہ اور مملکت میں سیاحت سمیت مختلف قسم کے ویزوں کے حصول کے طریقہ کار کو آسان بنایا جا سکے۔المنصوری نے مزید کہا کہ یہ پلیٹ فارم 50 سے زیادہ سرکاری ایجنسیوں اور نجی شعبے کی کمپنیوں کو سرکاری ویزے کے ذریعے بااختیار بنانے میں اپنا حصہ ڈالے گا اور وزیٹر کے تجربے کو بہتر بنانے کے مقصد سے ویزا جاری کرنے کے اہم ترین طریقہ کار کو خودکار بنائے گا۔انہوں نے نشاندہی کی کہ یہ ایک سمارٹ سرچ انجن ہے جو وزیٹر کو دستیاب ویزوں کو آسانی اور سہولت فراہم کرے گا اور تمام قسم کے ویزوں کی ضروریات اور ان کے لیے درخواست دینے کے طریقہ کار کے بارے میں جان کاری فراہم کرے گا۔
